السيناريو المثالى للمرحلة الإنتقالية !

تخيل إن السيناريو بتاع المرحلة الإنتقالية كان كالتالى:-

1- تم إسقاط دستور 71 كليا, ووضع مخطط اولى للمرحلة الانتقالية بمواعيد واضحة.

2- وضع إعلان دستورى مختصر يتضمن المبادىء الأساسية ومبادىء حقوق الإنسان.

3- الإعلان عن إنتخاب لجنة تأسيسية من 100 عضو من بين قوائم مقترحة (من النقابات المستقلة أو الأحزاب أو المستقلين أو الجمعيات الدعوية وغيرها)تتضمن كل طوائف الشعب المصرى (قانونيين دستوريين ومختلف الوان الطيف السياسي والدينى وممثلين لمختلف أقاليم مصر من فئات عمرية ومهنية مختلفة).

4- تكون هذه القوائم مستوفية لشروط عامة توضع مسبقا ثم يترك للناس التصويت عليها بنفس طريقة الإستفتاء (مصر كلها لجنة إنتخابية واحدة)

5- يتم تفعيل قانون الغدر على كل قيادات الحزب الوطنى ومرشحيه و رموزه, ليتم حرمانهم من العمل السياسيى لمدة 5 او 10 سنوات, وبالتالى نكون قد تخلصنا منهم فى كل الإنتخابات بعد ذلك.

6- يعلن عن الإنتخابات التأسيسية فى أول شهر مايو (شهرين ونصف بعد التنحى) .

7- يوضع للأعضاء المنتخبين مدة شهرين للإتفاق على مسودة دستور مصرى حديث.

8- عرض المسودة على الرأى العام وعموم القوى السياسية والدينية والمهنية والأقليمية فى مصر ... لمدة شهر.

9- تمكين الاعضاء من الإستعانة بالفقهاء الدستوريين لضبط الصياغات وكتابة الدستور بشكل قانونى منضبط.

10-وضع أسبوعان لصياعة الشكل النهائى للدستور (والذى يتضمن كيفية تعديلة ونسب التصويت على المواد المراد تعدجيلها فى المستقبل من قبل البرلمان)

10- الإستفتاء على الدستور الجديد (فى منتصف شهر أغسطس)

11- فى حالة عدم الموافقة على الدستور المقترح يطرح من جديد لمدة أسبوعان على الرأى العام .
ويعاد التصويت على المسودة الجديدة بعد شهر (أول شهر 10) على أن يكون دستور مؤقت ويتم إعادة النظر فيه بعد 5 سنوات.
مع حذف أى صيغ خلافية يمكن حذفها لضمان قبول الناخب للدستور المقترح بعد تعديله.. خصوصا أنه سيكون مؤقت.

12- يتم الإعلان للترشح لإنتخابات الرئاسة على أن تقام بعد الإعلان بشهرين (منتصف شهر أكتوبر أو أول شهر ديسمبر)

13- يؤدى الرئيس المنتخب (على أن يؤدى الرئيس القسم على تلفزيون الدولة وسط ممثلى أعضاء لجنة الدستور المنتخبين)

14- يتم الإعلان على إنتخابات البرلمان وفق قواعدة الجديدة فى الدستور الجديد (غالبا هيكون مكون من مجلس الشعب فقط وبدون نسبة العمال والفلاحين و بالقائمة النسبية المفتوحة فقط), على أن تكون الغنتخابات بعدها بشهرين (منتصف شهر ديسمبر أو أول شهر فبراير)

15- يعود الجيش لسكناته فور وجود رئيس منتخب معروف مهامة وفقا للدستور الحالى.

16- تقوم اللجنة التاسيسية المنتخبة للدستور وأخرى مكونة من المجلي العسكرى معا (وفقا لقواعد مسبقة) بمراقبة أداء الرئيس واستجوابه خلال الشهرين الذين يدعا فيهما لإنتخابات البرلمان.

17- خلاص بقى عندنا فى اواخر 2011 او اوائل 2012 دستور ورئيس وبرلمان والمجلس العسكرى فى سكناته !!

ولا فى جدل دستورى ولا وجع بطن ولا قلة قيمه !!

عموما دا إلى بيتم فى معظم الدول إبلى بتقوم فيها ثورات حقيقية جذرية زى إلى حصلت فى مصر.

فوق خلاص .. الحلم خلص وراح معاده ومعدش ينفع يتنفذ !!

المهم إننا نكون عرفنا الصح إيه ..و إننا نستفيد من تجاربنا.. وإننا نحترم إرادة الناس والسيناريو المرسوم بس نتقى شروره .. ونعرف إزاى نحاربها ..

الله - الوطن - الشعب

الكابوس القادم !!

غالبا السيناريو القادم كالتالى:-

1- يتم الإعلان عن الإنتخابات البرلمانية فى أخر نوفمبر.

2- عدم تفعيل قانون الغدر , و نزول قانون الإنتخابات كما هو مطروح (قائمة وفردى , عمال وفلاحين)

3- سينتج عن هذا البرلمان 65% عمال وفلاحين (لان القوائم لابد ان يكون فى اولها عامل او فلاح مما يمكنهم من تجاوز نسبة ال50% فى القوائم)

4- لوجود رأس مال قوى جدا ووجود إقتصادى قوى وسوابق إنتخابية وروابط قبلية وعصبية لفلول الحزب الوطنى ولوجود 8 أحزاب أسسها أعضاء فى الحزب الوطنى.
ولوجود أحزاب أمن دولة فى بعض تحالفات الإنتخابات, ولإستعانة بعض الأحزاب كالوفد بفلول الحزب الوطنى فى قوائمها الإنتخابية,
سيتمكن الفلول من الفوز (حسب خبراء) ب20 - 25% من القوائم و 35-50% من الفردى!!

5- يعنى تقريبا 35 % فلول

6- سينجح من القوى السلفية تقريبا 15% من عموم الأصوات (معظمها قوائم) وخصوصا فى الأسكندرية والصعيد.

7- سيتبقى تقريبا 35% للإخوان والباقى لباقى قوى الثورة.

8- سيعين المجلس العسكرى 10 أفراد فى البرلمان وطبعا سيغلب عليهم عناصر من المرأة والأقباط .

9- هذا البرلمان سينتظر أخيه الأصغر مجلس الشورى الذى سيتم فى منصف مارس إلإنتخابه, والذى سيتم تعيين ثلث عدد أعضائه !! .. يعنى المجلس مشرفنا بوجوده تماما تماما من قلب البرلمان عن طريق إختياراته.

10- لن يكون من حق البرلمان بشقيه تكوين وزاره او اختيار رئيس وزراء (وفقا لتصريح اللواء ممدوح شاهين), ولن يحق له سحب الثقة من المجلس او محاسبته!!
يعنى محدش يقول الإنتخابات هتخلينا نخلص من حكم العسكر !! .. لا فككوا .. محدش يضحك عليكم ,.. المجلس العسكرى مشؤرفنا لغاية ما يعين رئيس وحكومته مشرفانا برده لحد ما يبقى فيه رئيس!!

11- سيطلب من المجلس إختيار لجنة مكونة من 100 شخص وسط مهاترات رائعة :-

* من داخل المجلس أم من خارجه؟!
* كيفية الترشح (فردى , قوائم , موافقة بعض الأعضاء)؟!!
* كيفية إنتخابهم هل بأغلبية 50% +1 أم بأغلبية الثلين أم بالإجماع؟!
* من الذى يفصل أو ينظم؟!

12- ناهيك بقى حضرتك على إن المجلس تلته فلول و حوالى سدسه سلفيين يمارسون العمل السياسى للمرة الأولى (ودا طبعا حقهم) مع صراع القوى الدينية والمدنية الذى نعيش فيه.

زعلانين ليه .. ما هو برلمان جاى لغرض واحد فقط هو تكوين الدستور

13- المدة الزمنية المتروكة لإختيار اللجنة مفتوحة , يقول الخبراء(ربما تكون من 3 إلى 6 أشهر)!!

14- أما بعد تكوين اللجنة فأمامها 6 شهور لتكوين دستور مطروح للتصويت, ومش هتكلم عن صراعات الأحزاب والقوى السياسية إلى كل واحدة هتخش بأيدلوجياتها وكوادرها ورموزها عشان يبقى الدستور مطبع بطبع أيدلوجيتها مش بطبع مصر المتنوع الوسطى!!

15- طيب اللجنة دى هتتفق مع بعضها إزاى و على أى أسس هتكون قواعد الإتفاق والخلاف (التوافق التام مستحيل) لانها رؤى أحزاب وأيدلوجيات مش عمل أفراد لا يعبرون سوى عن أنفسهم كما كان مقترحا من إنشاء لجنى تأسيسية منتخبة للدستور من قوائم أفراد مش أحزاب وجماعات ..
يبقى لا زم يكون مسبقا فيه قواعد ترجح نسبة الإتفاق المرجوة وأليه تصويت داخهلية على كل مادة من مواد الدستور المقترح .

16- المهم مش هطول عليكم .. هنفترض إن ال 6 أشهر دول مروا بسلام على دستور مقترح.. وإتوافق عليه .
لإنهم لو ما مروش بسلام .. معرفش الجيش ممكن يعمل إيه؟!!

13- كل قوى سياسية ستخرج من هذه الإنتخابات منهكة القوى .. منفقة مبالغ فلكية , ولن يكون عندها إستعداد لإعادة الإنتخابات بعد التصويت على الدستور (لان الدستور المفروض يكون خالى من فكرة عمال وفلاحين ومن فكرة مجلس شورى ومن فكرة انتخابات فردى!!)

14- طبعا مفيش برلمان 65% منه عمال وفلاحين هيوافقوا على إلغاء النسبة الفاشلة دى.
ولا حد فيهم من أعضاء الشورى هيوافق على فكره إلغائه (خصوصا بقى لو فيه قوة واخدة نصيب الأسد فيه !!), وطبعاإلغاء موشوع الفردى هيتطلب إعادة الإنتخابات ودا طبعا على جثه السادة الأعضاء خصوصا الفلول !!

15- يعنى على أحسن تقدير هيستثنوا فى الدستور البرلمان دا .. حتى إنتهائه بعد 5 سنوات !! ليتم تفعيل ما نحلم به فى إنتخابات البرلمان إلى المفروض إنه بيمثلنا.

16- إحنا بقينا دلوقت فى ديسمبر 2012 (3 أشهر تكوين اللجنة و6 أشهر دستور جديد بعد تكوين مجلس الشورى فى مارس 2012!!)

17- يعنى على اوائل 2013 ممكن عمل إنتخابات رئاسية (وأتمنى إن عمرو موسى والبرادعى و الأشعل ومجدى حتاته - اطال الله عمرهم - يكونوا لسه عايشين :))

18- طبعا لو إحنا لسه فاكرين مطالبنا هيبقى حظنا خلو لو البرلمان اّثر على نفسه وحط فىالدستور الغاء النسب بتاع العمال والفلاحين و اقر القائمة النسبية ولغى الشورى ,. وقتها هيأخروا إنتخابات الرئاسة (لإن مفيش برلمان يحلف قدامة الريس!!) لحين اعادة إنتخاب مجلس الشعب .. يعنى هنخلص المرحلة الإنتقالية فى أبريل 2013 !!

19- بالنسبة للناس إلى زعلانين من المظاهرات الفئوية .. هل منتظر من العمال والفلاحين والاطباء والمعلمين والمدرسين والأثريين والبيطريين والزراعيين والعلميين أن ينتظروا حتنى ميزانية يوليو 2013 عشان امورهم تتحسن !!

20- فى الوقت إللى الميزانية الحالية فيها 20 مليار جنية سنويا ممكن توفيرهم بوضع حد اقصى للأجور 30 ألف جنية (30 ضعف الحد الأدنى) إلى ممكن يكون بجره قلم 1200 جنية, وفى الوقت إلى فيه دعم طاقة لمصانع الحديد والأسمنت ب 35مليار جنية سنويا رغم إن الشركات دى بتبيع فى مصر اغلى من سعر التصدير العالمى إلى بتبيع بيه !!

21- طبعا لن يصمت هؤلاء وهم يكونون 90% من شغب مصر, وسيكون رد الجيش معروف فى هذه الفترة (قانون طوارىء ومحاكم عسكرية وإعتقالات , مع إستخدام الإعلام الحكومى للتغطية كالعادة)

اسف إنى دخلتكم فى كابوس .. بس للأسف هذا هو السيناريو الأكثر واقعية للعامين القادمين فى مصر . إلا إذا شملنا الله عز وجل برحمته!
اللهم أرحم مصر والمصريين .. ولا تفضحنا بين الأمم .. اّمييييييييين

الله - الوطن - الشعب